Gjermania mposhti Bosnjën, 3:1

Gjermanët është dashur të kthehen nga disavantazhi prej 1:0, për ta fituar takimin miqësor ndaj Bosnjës, me rezultatin 3:1, në përgatitje për Botërorin, “Afrika e Jugut 2010”.

Gjermanët luajtën më mirë, por të parët në epërsi kaluan boshnjakët, me anë të golit të sulmuesit më të kërkuar në Evropë, Edin Dzeko në minutën e 15’.

Në pjesën e dytë, gjermanët u kthyen fuqishëm me anë të kapitenit Filip Lam, që barazoi rezultatin ne minutën e 50’.

Për rezultatin përfundimtar 3:1 u përkujdes Bastian Schveinsteiger, që shënoi dy herë nga penalltia në minutat 73’ dhe 77’.

Kjo fitore shton besimin e gjermanëve para Botërorit dhe padyshim se gjermanët do të jenë njëra nga ato kombëtare që mund të kenë fjalën e fundit në këtë garë, për shkak të traditës dhe shpirtit luftarak edhe pse nuk është skuadra më e mirë e mundshme./KNN